كورس ملوش لازمه
كورس ملوش لازمه ….
كام مره حضرت كورس وكان ممل جدا ؟
كام مره حضرت كورس وحسيت انك رميت فلوسك على الفاضى ؟
كام مره روحت تدريب وكنت بتقاوم النوم بالعافيه ؟
فى مره من المرات روحت احضر كورس تدريبى كنت منتظراه من زمان عند واحد من اللى اساميهم رنانه جدا ….انا بطبيعتى بحب التعلم جدا وبستمتع بيه …
فاول ما الكورس ده بدأ حجزت وروحت علطول …
كنت متحمسه جدا لبداية التدريب ….وللاستفادة من كل المعلومات والمهارات ..
وفى اول يوم ….بدا الكورس بأن المدرب عرف نفسه فى حوالى نصف ساعه واكتر ….
وقعد يتكلم عن شهاداته وانجازاته وازاى انه احسن واحد فى مجاله …..
وبعدين عرض محتويات البرنامج وبدأ يشرح فى كل جزء …..
عدت اول ربع ساعه وبدات احس ان دماغى بتتقل ….وانى بدات اقاوم النوم …..
وبعدين فكرت انى اكتب عشان اتنشط بدات اكتب لكن مفيش فايده برضه الكلام تقيل اوى والوقت بيمر تقيل اوى …..
دخل فى جزء جديد ..ولقيت فيه سؤال نط فى دماغى ….قلت حلو اوى اوى …اقوم اسال واتناقش معاه …منه اصحصح …..ومنه احس ان فيه فايده او قيمه اخدتها من اليوم الى بيروح هدر ده ….
فرفعت ايدى وأستاذنته فى سؤال …لكنه اعتذر عن الرد وقال هاخد الأسئله فى نهاية اليوم ….
ابتديت اتلفت حواليه لقيت ناس كتير بدأت تمسك الموبايل تقلب فيه …وناس سندت راسها على الترابيزه وناس نامت فعليا وهيه قاعده …وناس تانيه بدأت تتكلم مع الى جنبها ….
وبدات اسأل الناس الى حواليا عن رأيها فى الكورس ولقيت وجهة نظر معظم الناس الملل وان الكورس مفيهوش حاجه جديده
من جوايا بدأت اندم انى جيت الكورس ده ..وقلت هو ده الكورس الى كنت مستنياه بقالى سنه وزياده ؟؟؟؟؟
هيه دى الأسماء الرنانه الى الناس بتتحاكى عليها ؟؟؟؟
وبدات افكر من جوايا إزاى هقدر اكمل ايام الكورس الى جايه كده ؟؟؟؟؟
وجوايا احساس كبير بالندم على هدر الوقت لو جيت وهدر الفلوس لوسبتها ومحضرتش خاصه ان الكورس مكانش فيه سياسة رد تكلفة البرنامج فى حالة ان المتدرب مش راضى عن البرنامج يعنى البرنامج كان Non Refundable …
ابتديت اقضى وقتى وخلاص …الوقت تقيل اوى اوى على قلبى …وبقيت احضر كل يوم على أمل انى اخد اى معلومة تفيدنى …
وبدأت اتواصل مع الناس الى فى الكورس واعمل Networking ويمكن دى الفايده الوحيده الى بنطلع بيها فى الحالة دى ….الناس الحلوة الى بنتعرف عليها ….
قعدت افكر طيب هو ايه السبب ان الكورس ده ممل كده ؟؟؟؟
لي انا حاسه انه ملوش لازمه اصلا ؟؟؟
– اول حاجه الحقيقه ان المدرب مهتمش اساسا انه يشاركنى او يشارك المتدربين فى اى شئ …فلا هناك مشاركة ولا تفاعل ….مكانش بيهتم اننا نشاركه خبرتنا الحياتيه عشان نستفيد No Interaction…. and No Participation
– مفيش تطبيق لاى حاجه من المعلومات الى كان بيقولها …باى شكل …No Practice
– مفيش قيمة …لان كل المعلومات الى كان بيقولها على كثرتها إلا انها معلومات قديمه معلمهاش Update من سنين >>>
– مهتمش انه يستخدم اى ادوات جديده فى التدريب او حتى يستخدم اى وسائل توضيحية تشرح فكرته غير باستخدام بس اساوب المحاضره والكلام فبالتالى انا وكل الحاضرين فصلنا بعد اول عشر دقائق .
قعدت افكر ..كان ممكن بحاجات بسيطة الكورس ده ينجح …
كان ممكن يكون كورش مختلف ومميز لو كان فيه ببساطه إهتمام اكبر ب:
1. التفاعل والمشاركه .Interaction & Participation
2. التطبيق العملى والتجربة Practice
3.تنوع فى وسائل التدريب وعدم الأعتماد على اسول المحاضره فقط .
4. السماح بالمناقشة وعدم وضح قوانين ومنع الأسئله لاخر البرنامج .
5. الأهتمام بالتحديث وعمل الUpdate اللازم للمعلومات عشان ببساطه يكون الكورس بيعبر عن مشاكل الواقع الى احنا عايشينه ويقدر يحل المشكلات والتحديات الى بنمر بيها كل يوم .
ببساطه كورس ملوش لازمه …وكتير مننا بيحضروا كورسات ويكتشفوا انها كورسات ملهاش لازمه مع انها ممكن لو الى بيدى الكورس كان مدرب حقيقى مش محاضر تكون كورسات مفيده جدا وممتعه فى نفس الوقت.